Arazua (Montevideo, 1929) e Raza Celta (Montevideo, 1934) son as dúas cabeceiras de prensa que, no ámbito da emigración galega en Uruguai, situamos na liña da prensa político-cultural de orientación galeguista e autonomista, inspiradas pola Asociación Protectora da Cultura Galega e polo Comité Autonomista Galego respectivamente. O doutor Constantino Sánchez Mosquera promoveu estas publicacións que difundiron a cultura galega, apoiaron as nosas institucións culturais e informaron os galegos de Uruguai. Recuperadas e editadas conxuntamente en edición facsimilar, as fichas técnicas, índices e notas introdutorias, facilitan a consulta e o alcance destas páxinas onde colaboran ilustres escritores e académicos galegos, mentres Galicia se proxecta en terras americanas onde ecoan novos tempos e novas ilusións para o país.