No terreo da prensa galega da emigración en Cuba é Eco de Galicia (A Habana, 1917-1936) unha cabeceira de singular relevo. Subtitulada “Revista ilustrada y de información de la colonia gallega en Cuba”, contou con moitos e moi importantes colaboradores (Mercedes Vieito, Lesta Meis, Blanco Torres, M. Murguía, F. Vaamonde Lores, Victoriano Taibo, R. del Valle-Inclán, Filgueira Valverde, Otero Espasandín, Xavier Bóveda, Andrés Muruais entre outros) e un importante material de ilustracións. Editamos aquí, en libro e CD-ROM, os anos 1917-1918 de Eco de Galicia, primeiros da revista (77 números en total) que van precedidos dun estudo da publicación (trazos externos, temas, lingua, ficha técnica) e dos índices que facilitan a consulta das súas páxinas e números.